ايران نه يه ويران اولدو؟
ايران نه يه ويران اولدو؟
http://www.navidazerbaijan.com/arshive/showcontent.asp?ID=460&issonum=334&pagenum=4
ميرزه علي اكبر صابير
آغلاديقجا كيشي غئيرتسيز اولور
نئجه كي آغلادي ايران اولدو!!
او زامان كي بئزيكيب شاه قاچدي
مورتجيعلر داهي پونهان اولدو
« پارلامان» پارلادي اعضاسي ايله
دئديك : ايران يئنه ايران اولدو
مجليس ايچره اومناسي ميللت
نام-ى ميللييته شايان اولدو
دوزه‌ليب ايشلرين اسكيك، گره‌يي
ميللتين دردينه درمان اولدو
لئيك بيز ايشبو تمنناده ايكن
باخ كي ايراندا نه دستان اولدو !!!
هر يئتن گئچدي جماعت باشينا
هر اؤتن سيلسيله جونبان اولدو
يئتدي بير مرتبه‌يه صورت-ى كار
« پارلامان» قهوه‌چي دوككان اولدو
ايچيلن چاي، يئييلن ياغلي پيلوو
چكيلن حوققا-و قليان اولدو
« پارلامان»دير بالام آخير بورادا
كيم دانيشدي، نه سؤز عونوان اولدو ؟
هانسي بير مساله‌دن بحث ائديليب .
حاصيلي ميللته ائعلان اولدو؟
يوخ افنديم، يانيليش ظنن ائتمه ،
سانما ايش لاييق-ى ويجدان اولدو!
دوغرو، گرچي اوفوق-ى ايراندان
شمس-ى مشروطه ديرخشان اولدو
يعني ميللت ايشي ميللت الينه
وئريليب مساله آسان اولدو
شيمدي اؤز ايشلريني ايجرايه
دست-ى ميللتده بير ايمكان اولدو؟
لئيك بيلدينمي بوزورگان-ى وطن
بئله ايش گؤردو كي شايان اولدو
چيرمانيب ايش گؤره‌جك بير ده ـ يازيق
واي ددم، واي دييه گيريان اولدو
گؤزلولر باشلاديلار آغلاماغا
كورلر ده اونا خندان اولدو
ايش ياتيب قالدي آراده اؤلو تك
نه اونا مئيل، نه امعان اولدو
اصل-ى مطلب اونودولدو لاكين
فرع-ى كاري هامي جويا اولدو
گؤردو ميئداني آدامدان خالي
هره بير عزمه شيتابان اولدو
هر كس آنجاق باجاريب آلدي لقب
داخل-ى زومره-يي اركان اولدو
دورتولوب، سوخدو اؤزون پارلامانا
پارلامان مجمع-ى عيرفان؟ اولدو
پاه .... ! نه چوخدور بوتون ايراندا لقب
كيمي بگ اولدو، كيمي خان اولدو
چيخدي مئيدانه مولققب كيشي‌لر
بخته ورلر هامي اعيان اولدو
ايش نئجه اولدو، اونو آلما خبر
باياق عرض ائتديم، او نيسيان اولدو
بير ديين اولمادي ائي خانه خراب
مملكت خاكيله يئكسان اولدو
سيز هله عاشيق-ى شئيدا-يي لقب
بو دا مي لاييق-ى اينسان اولدو؟
لقب ايش گؤرمز افنديم، كيشي‌نين
آدي يا (سام)-و (نريمان) اولدو
كيشيدن ايسته‌نيلن ايشدير، ايش
كيم كي ايش ياپدي، او ذىشان اولدو
دئه گؤره ك ايندي موقددس وطنين
هانسي بير موشكولو آسان اولدو؟
آنجاق ايش گؤردو لقب فابريكاسي
بوتون ايشلر اونا قوربان اولدو
ايندي قانديقجا ايشين انگليني
دئمه: «ايران نه يه ويران اولدو؟»
0 Comments:
Post a Comment
<< Home