لاي لاي بالا لاي لاي
ميرزه علي اكبر صابير ( 1911 – 1862 )
ترپنمه٬ آماندير!
ترپنمه، آماندير بالا! غفلتدن آييلما.
آچما گؤزونو، خواب-ى جهالتدن آييلما،
لاي لاي٬ بالا لاي لاي !
يات٬ قال دالا لاي لاي !
آلدانما آييقليقدا فراغت اولا، هئيهات !
غفلتده كئچنلر كيمي لذذت اولا، هئيهات !
بيدار اولانين باشي سلامت اولا، هئيهات !
آت باشيني يات، بستر-ى راحتدن آييلما،
لاي لاي، بالا لاي لاي !
يات، قال دالا لاي لاي !
آچسان گؤزونو، رنج-و مشققت گؤره جكسن،
ميللتده غم، اوممتده كدورت گؤره جكسن،
قيلديقجا نظر ميللته، حئيرت گؤره جكسن،
چك باشينا يورغانيني، نيكبتدن آييلما،
لاي لاي، بالا لاي لاي !
يات، قال دالا لاي لاي !
بير لحظه آييلدينسا، قوتار جانيني، يوخلا،
آت تيرياكيني، مئيل ائله قليانيني، يوخلا،
اينجينسه ساغين، سول يانيني وئر يئره، يوخلا،
ايللرجه شوعار ائتدييين عادتدن آييلما،
لاي لاي، بالا لاي لاي !
يات، قال دالا لاي لاي !
گؤز نورودو اويخو، اونو دور ائتمه گؤزوندن،
يول وئرمه، مبادا چيخا بير آن سؤزوندن،
آمما ائله برك يوخلا كي حتتا گئت اؤزوندن،
آفاقي توتان شور-و قييامتدن آييلما،
لاي لاي، بالا لاي لاي !
يات، قال دالا لاي لاي !
نصيحت
ائي خاجه، چاليش صورت-ى ظاهيرده قشنگ اول !
ايسترسن اؤزون سيرت-ى معناده جفنگ اول !
قوي آديني عاريف ولي عيرفاني بگنمه،
عاريفلر ايله گيزليجه آماده-يى جنگ اول !
حئيوان كيمي بير بارهده پالچيقدا قالاندا،
سال فيتنهلي سؤز اورتاليغا، حؤوصله تنگ اول !
يوزلرجه زييان خلقه وور، اؤز خئيريني گؤزله،
آلداتما اؤزون بير كسه، هوشيار-و زيرنگ اول !
گر مصلحت اولسا ايشيني قيل ايكىاوزلو،
بير ياندا قويون، اؤزگه طرفلرده پلنگ اول !
آت مسلكيني بيرجه گئجه حبسده قالسان،
شئيطانليغا عادت ائده رك، زوربا نهنگ اول !
بابي دييه تكفير ائله حقگولري كوللن،
ايسترسن اؤزون رهگذر-ى حققده لنگ اول !
شاپقالي1 موسلماني گؤروب لعن اوخو هر دم،
موللا ايله خان، بيگ قاپيسيندا سهپه لنگ اول !
بنزتمه
سئودا-يي موددتدن، خالي گؤرونور باشلار،
بيگانه بيلير يئكسر، قارداشلاري قارداشلار،
گؤزلر داها قان ساچسين، بيتسين ساچيلان ياشلار،
آغلار بيزه تورپاقلار، داغلار، درهلر، داشلار ...
زينهار! ائدهليم خيدمت! اينسانليغا يولداشلار،
غئيرت آ وطنداشلار! هيممت آ وطنداشلار !
كيشي
دورما، ييخيل، يات هله فاهرات، كيشي !
عصري گؤروب، قالما بئله مات، كيشي !
ايندي اولوب يورقانين اوچ قات، كيشي !
ساققاليني بير - ايكي ييرغات، كيشي !
چك باشينا يورقانيني يات، كيشي !
اوول-ى شبدن اوزانيبسان بئله،
راحتي ياتاماقدا قانيبسان بئله،
ياخشي دا الحق اينانيبسان بئله،
لاكين اينانمام اوسانيبسان بئله،
چك باشينا يورقانيني يات، كيشي !
عؤمر اؤتوشوب، باش آغاريب اون كيمي،
ديش تؤكولوب، ساققال اولوب يون كيمي،
سينه چؤكوب، بئل بوكولوب نون كيمي،
گرچى اولوبسان قوجا مئيمون كيمي،
لئيك يئنه روبه-ي ملعون كيمي،
تئز گؤتوروب تيرياكيني آت، كيشي !
قاليانيني چاغلا، خورولدات، كيشي !
بير قده ر اؤز سينهني توخدات، كيشي !
چك باشينا يورقانيني يات، كيشي !
سئوال – جواب
جاوان – قوجا
- شهر-ى معلومونوزون وضع-و قراري نئجه دير؟
- حمد ليللاه، نئجه گؤرموشدوسه «نوح»٬ اؤيلهجه دير !
- يئني مكتب آچيليبمي وطن اؤولادي اوچون؟
- آز دئييل آدم آچان مدرسه احفادي اوچون !
- اوخويورمو قزئته شهرينيزين اهلي تمام؟
- بعضي سارساق اوخوموشلار اوخويور، من اوخومام!
- اؤلكهنيزده آچيلبديرمي قرائت خانه؟
- تازهلر آچميشيدي، قويدوق اونو ويرانه !
- آج قارينداشلارا اينفاق ائديليرمي؟ عمي جان !
- اونو گؤرمزمي خودا، ائل نييه وئرسين اونا نان؟
- بيوه اؤورتلرين امري آلينيرمي نظره؟
- جاني چيخسين، او دا گئتسين يئنى بير تازه اره !
- ايتتيحاد امرينه دايير دانيشيرسيزمي باري؟
- دانيشير بير پاراميز، لئيك بوغازدان يوخاري !
- سونني-و شيعه تعصصوبلري لغو اولدومو يا؟
- نه دئدين؟ كوفر دانيشدين! جيرارام آغزينى ها..!
- قابيل-ى عرض سؤزوم يوخ، منى عفو ائت، گئديره م....
- به جهننم كى گئديرسن، سنى خود من نئديره م؟!
بونا باخ، آغزينا باخ، صورت-ى ادبارينا باخ!
باشىنين شاپقاسينا، ائتدييى گوفتارينا باخ!
0 Comments:
Post a Comment
<< Home