آخ نئجه كئف چكمه لي ايام ايدي
آخ نئجه كئف چكمه لي اييام ايدي
آخ نئجه كئف چكمه لي اييام ايدي
اوندا كي اؤولاد-ى وطن خام ايدي
اؤز حق-ى مشروعونو بيلمزدي ائل
چؤهره-يى حوررييته گولمزدي ائل
گؤزلريني بير كره آچمازدي ائل
غزته يه، ژورناله اييلمزدي ائل
داييم ائشيتديكلري اؤوهام ايدي
آخ نئجه كئف چكمه لي اييام ايدي
اؤلكه ده بونجا يوخ ايدي عئيبجو
نئيلر ايديك سه گؤرونوردو نئكو
خلقده ديداريميزه آريزو
بيزده واريدي نه گؤزه ل آب-ى رو
حؤرمتيميز واجيب-ى ايسلام ايدي
آخ نئجه كئف چكمه لي اييام ايدي
ميللته چاتديقجا غم، عيياش ايديك
حاكيمه يار، آميره قارداش ايديك
قيبله-يى طاعتگه-ى اؤوباش ايديك
هاردا آش اولسايدي، اورا باش ايديك
هر گئجه هر گون بيزه بايرام ايدي
آخ نئجه كئف چكمه لي اييام ايدي
گرچى ريياايدي بوتون كاريميز
كار ايله برعكسيدي كيرداريميز
لئيك همان واريدي ميقداريميز
حؤججت ايدي هر كسه گوفتاريميز
خالقين ايشي بيزلره ايكرام ايدي
آخ نئجه كئف چكمه لي اييام ايدي
عئيبيميزي چولغالاميشدي عبا
هر نه گليردي بوشاليردي قابا
كيم نه قانيردي نه دي زوهد-و رييا
نا خوشه خاك-ى دريميزدن شفا
صؤومعه ميز كعبه-يى احرام ايدي
آخ نئجه كئف چكمه لي اييام ايدي
بيزلريديك خالقين اينانديقلاري
پير-ى هيدايت دييه قانديقلاري
نور گؤرورلردي قارانليقلاري
بيزده ايدي جومله قازانديقلاري
كيم بيزه پول وئرمه سه بدنام ايدي
آخ نئجه كئف چكمه لي اييام ايدي
ايندي آداملار دييه سن جين ديلر
جين ندي، شئيطان كيمي بىدين ديلر
لاپ بيزي اووسارلاديلار، مينديلر
آي گئچن اييام! اولاسان اينديلر
اونداكي اؤولاد-ى وطن خام ايدي
آخ نئجه كئف چكمه لي اييام ايدي
قايناق : هوپ هوپ نامه(ميرزا علي اكبر صابير)
0 Comments:
Post a Comment
<< Home