sâbir-türkce

ميرزا علي اكبر صابر (1911-1862)

خالق شاعيري ميرزه علي اكبر صابير، آذربايجان ادبيياتي تاريخينده شرفلي يئر توتان بؤيوك سيمالاردان بيرىدير. او 1862 –جي ايلده، شيرواندا آنادان اولدو. اونون اؤز آدي ميرزه علي اكبر طاهيرزاده ايدي آمما اثرلرينده صابير تخللوص ائدردي. اونون اينقيلابي دئموكراتيك پوئيزيياسي اؤز موعاصيرلييي، خلقىلييي، يوكسك صنعتكارليغي و درين رئاليزم ايله آذربايجان مدنييتينين بديعي و ايجتيماعي فيكيرلرينين ترققىسينده موستثني رول اويناميشدير. تدقيقات گؤستريركي، هله بؤيوك شاعيرين ساغليغيندا اونون اثرلري يئرلي مطبوعاتلا ياناشي، تيفليس، پترزبورگ، هشترخان، سمرقند و ايستانبول شهرلرينده و باشقا يئرلرده چيخان قزئت، ژورنال و مجموعه لرده ده درج اولونموش، شؤهرت تاپميشدير. او اؤز شئعرلرينده ايستيبدادچي محممدعلي شاهي دانلاييب، ستتارخانين و باشقا مشروطه چىلرين هونري و شرفيني آلقيشلايير. او جليل محممدقولىزاده ايله بيرليكده، موللانصرالددين درگى سينده چاليشيردي. اؤنون اثرلري هوپ هوپ نامه ديوانيندا توپلانيبدير.

آذربايجانين اولو اينتيقادي- ايجتيماعي و ساتيريك شاعيري 1915-ايلده دونيادان كؤچدو .

ميللت نئجه تاراج اولور اولسون٬ نه ايشيم وار؟

ميللت نئجه تاراج اولور اولسون٬ نه ايشيم وار؟
دوشمنلره مؤحتاج اولور اولسون٬ نه ايشيم وار؟
قوي من توخ اولوم٬ اؤزگه لر ايله ندي كاريم،
دونيا و جهان آج اولور اولسون٬ نه ايشيم وار؟

سس سالما، ‌ياتانلار آييلار، قوي هله ياتسين،
ياتميشلاري راضي دئييلم كيمسه اوياتسين،
تك تك آييلان وارسا دا، حق داديما چاتسين،
من ساليم اولوم٬ جومله جهان باتسا دا باتسين،
ميللت نئجه تاراج اولور اولسون٬ نه ايشيم وار؟
دوشمنلره مؤحتاج اولور اولسون٬ نه ايشيم وار؟

سالما ياديما صؤحبت-ى تاريخ-ى جهاني،
اييام-ي سلفدن دئمه سؤز٬ بير ده فيلاني،
حال ايسه گتير مئيل ائله ييم دولماني، ناني،
موستقبلي گؤرمك نه گرك؟ عؤمردو فاني،
ميللت نئجه تاراج اولور اولسون٬ نه ايشيم وار؟
دوشمنلره مؤحتاج اولور اولسون٬ نه ايشيم وار؟

اؤولاد-ي وطن قوي هله آواره دولانسين،
چيركاب-ى سفالتده الي٬ باشي بولانسين،
دول آروات ايسه ساييله اولسون٬ اودا يانسين،
آنجاق منيم آوازه-يى شانيم اوجالانسين،
ميللت نئجه تاراج اولور اولسون٬ نه ايشيم وار؟
دوشمنلره مؤحتاج اولور اولسون٬ نه ايشيم وار؟

هر ميللت ائدير صفحه-يى دونياده ترققي،
ائيله ر هره بير منزل-ى ماواده ترققي،
يورقان دوشه ييمده دوشه گر ياده ترققي،
بيز ده ائده ريك عالم-ى رؤياده ترققي،
ميللت نئجه تاراج اولور اولسون٬ نه ايشيم وار؟
دوشمنلره مؤحتاج اولور اولسون٬ نه ايشيم وار؟

صيرف عوام اولمالىييز

ياشاماق ايستر ايسه ك، صيرف عوام اولمالي ييز
آتيب اينسانليغي، بالجمله هوام اولمالىييز !
ياشاماق ايستر ايسه ك، دهرده امنييت ايله ،
عئلم-و فننه، اودبايه باخاليم نيفرت ايله ،
اوياليم فيتنه لره الده كي وحشييت ايله ،
ياتاليم بستر-ى غفلتده اوزون موددت ايله ،
پوخته ليكدن نه يئتر؟ بيز هله خام اولمالىييز !
ياشاماق ايستر ايسه ك، صيرف عوام اولمالىييز

باليشا باش قوياليم، يورقاني بر دوش ائده ليم ،
پنبه-يى غفلتي يوخ، زئيبقي در گوش ائده ليم ،
خواب-ى اووهام گؤروب، سئيل كيمي جوش ائده ليم
غئيرت و هيممت-ى ايسلامي فراموش ائده ليم ،
دوستا مايه-يى غم، دوشمنه كام اولمالىييز !
ياشاماق ايستر ايسه ك صيرف عوام اولمالىييز

فيكر-ى تدريس ائدن اشخاصي، كنار ائتمه لىييز ،
هر ناسيل اولسا، بو بىدينلري زار ائتمه لىييز
اؤلكه دن بونلاري، مجبور-ى فرار ائتمه لىييز ،
تئز زاماندا وطني٬ ميللتي خار ائتمه لىييز ،
بؤيله جه ناييل-ى مقصود-و مرام اولمالىييز !
ياشاماق ايستر ايسه ك، صيرف عوام اولمالىييز

باشقالار چوخ دا بالونلارلا ائدير سئير-ى هوا ،
بيز بو سئيري ائديريك، خوابدا هر صوبح-و مسا
قوول-ى آخوندو اونوتدون مو كي، وعظ ائتدي سانا :
«دهر فانىدير عزيزيم، اونا اويما ابدا !»
ترك-ى دونيا ايله فيردوسه خورام اولمالىييز !
ياشاماق ايستر ايسه ك، صيرف عوام اولمالىييز

نه بيليرسن هله سن، صحنه-يى رؤيا ده نه وار؟
اهل-ى ظاهير نه قانير عالم-ى معناده نه وار!؟
هر نه وار خوابده وار، يوخسا بو دونياده نه وار
ياخشي يات، قول قاناد آچ، اوچ گؤر او ماواده نه وار
حظظ-ى رؤيا ايله، مشغول-ى منام اولمالىييز !
ياشاماق ايستر ايسه ك، صيرف عوام اولمالىييز


يات٬ دولاش جننت-ى اعلاده كى ريضوانلار ايله
قول بويون اول مزه لش حورى-و غيلمانلار ايله
يئ! ايچ! آرتيق كئفه باخ جومله موسلمانلار ايله
قوى بو دونيانى بو كافيرلره شئيطانلار ايله

بيز ملكلرله اوچوب عالى مقام اولمالىييز
ياشاماق ايستر ايه ك٬ ص[رف عوام اولمالىييز

قوى اولار كشف-ى بداييع ائله سين صنعت ايله
پاراخود٬ يا واگون ايجاد ائله سين زحمت ايله
بيز وئريب پول مينه ريك٬ يول گئده ريك راحت ايله
نه موناسيب كى رقابت ائده ك هر ميللت ايله؟

بيزه آقاليق ائده ن اهله غولام اولمالىييز
ياشاماق ايستر ايسه ك٬ صيرف عوام اولمالىييز

قوربان بايرامي

بايرام اولجاق، شؤوكتلىلر، شانلىلار ،
دؤولتلىلر، پوللولار، ميليانلىلار ،
تير بويونلار، شيش قارينلار، جانلىلار ،
قوربان كسير خليل الله عئشقينه ،
فاغير – فوغور گزير الله عئشقينه .

ايكي قونشو بير بيرينين ميللتي ،
هر ايكىسي بير پئيغمبر اوممتي ،
بيري كسير قوربان، بيشيرير اتي ،
بايرام ائدير خليل الله عئشقينه ،
او بيرسي ده باخير الله عئشقينه .

بو قونشونون اوغلو گئيير، ساللانير ،
قالستوكو تاخير٬ قيراخماللانير ،
آتاسي دا اونا باخيب حاللانير ،
فخر ائله يير خليل الله عئشقينه ،
ال جيبه سالمايير الله عئشقينه .

گؤرورسنمي بيزيم حاجي پيرينى؟ ،
پايلامايير اتين اوندان بيريني ،
قونشو سورور بارماغينين كيريني ،
حاجي يئيير خليل الله عئشقينه ،
ياتير، شيشير، كؤپور الله عئشقينه .

دئديم حاجي گؤزل ايشين بيريسين ،
ديققت ائله ايره لىسين ، گئرىسين ،
وئر مكتبه قويونلارين درىسين ،
عئلم اوخوسون خليل الله عئشقينه ،
چوجوقلاري شاد ائت الله عئشقينه .

دئدي بيزده دري وئرمك سيناغي ،
يوخدور، وئرسم اوللام آرواد قيناغي
باسديريريق اوندا خمير چاناغي ،
بركتدير خليل الله عئشقينه ،
ساخلاييريق ائوده الله عئشقينه .

توپلايان : بابك چنگيز اوغلو